سمجهاڻي

جبل انهن لاءِ تمام گهڻو اوچو (ناقابل شڪست) آهي، جيڪي جيئڻ (زندگيءَ) جي لاءِ پريشان آهن (جن کي زندگي پياري آهي). آءٌ تہ موت (مرڻ) کي پاڻ سان گڏ وٺي هلڻ گهران ٿي. (پنھنجو رهبر سمجھان ٿي) ۽ ان جي پٺيان هلڻ لاءِ تيار آهيان (مون کي جبل ڇا ڪندو!)
[موت کي رهبر يا اڳواڻ سمجهڻ وارو تصور روميءَ جي هيٺين شعرن ۾ ملي ٿو:
کين حيات او را چه مرگي مي نمود،
کار پيشش باز گونہ گشتہ بود،
موت را از غيب مي کرد او گدي،
’ان في موتي حياتي‘ مي زدي.
(دفتر پنجم، ب- 2674)
معنيٰ: جيئن تہ هيءَ حياتي هن کي موت وانگر نظر ٿي آئي. هن لاءِ گويا معاملو الٽو ٿي ويو. هو غيب کان موت جي خيرات پيو گهري. بيشڪ منھنجي موت ۾ زندگي آهي، جو نعرو هڻي رهيو هو.]

[ شارح: ڊاڪٽر عبدالغفار سومرو ]